Илтгэхүй нь өгүүлэгчийн зорилго болон тухайн цаг үеийн нөхцөл байдлаас шалтгаалан янз бүрийн хэв маяг, хэлбэр агуулгатай байж болно. Танилцуулах хугацаа урт богино, ярианы төрлүүд өөр өөр байлаа ч илтгэгч, сонсогч, илтгэл, илтгэх хэв маяг гэсэн дөрвөн хэсгийн нийцэмжээс илтгэхүйн амжилт, бүтэлгүйтэл шалтгаална.

Илтгэх ур чадвар бол аль ч цаг үед бүхий л ажил мэргэжлийн суурь чадварын нэг байсаар ирсэн. Хүнтэй ажиллаж л байгаа бол харилцан ойлголцол, итгэлцэл, нэг нэгийгээ идэвхжүүлэх ажлууд алхам тутам гарна. Энэ бүхэнд харилцаа, илтгэхүй гол холбох үүргийг гүйцэтгэнэ. Ажил мэргэжлээс үл шалтгаалан аль ч ажлын байранд шаардагддаг бусад суурь чадваруудтай харьцуулахад илтгэхүй нь богино хугацаанд хөгжиж өөрчлөгдөж болдог. Хөгжих явцдаа бусад зөөлөн ур чадварын өөрчлөлтөд эерэг нөлөө үзүүлдэг. Илтгэхүйд суралцах шалтгааны талаарх судалгааны дүгнэлтүүдээс хамгийн их давтагдаж буй 7 ач холбогдлыг та бүхэнд хүргэж байна.

#1. Илтгэх эв дүйтэй болно. Бичиж бэлдсэн, бэлдэж амжаагүй шууд илтгэх, эсвэл бичвэр харж унших аль ч тохиолдолд сонирхолтой, үр дүнтэй илэрхийлэх ур чадваруудыг эзэмшинэ. Хэзээ ч үл мартагдах хүчирхэг илтгэлүүдийг бэлтгэх стратеги, тактикуудаас олж авдаг.

#2. Нухацтай сэтгэлгээ хөгжинө. Бүхнийг нэг доор илэрхийлэх цаг хугацаа нэгэнт байхгүй тохиолдолд хамгийн чухал гол санаануудыг зөв дараалуулж цэгцтэй, эхлэл төгсгөлтэй, өрнөлтэй агуулга бүтээж сурна. Бүгдийг биш чухлыг ялгах, чухлыг ойлгуулах онцгой чадвар сууна.

#3. Өөртөө итгэх итгэл нэмэгдэнэ. Судалгаагаар хүмүүсийн 75 хувь нь олон нийтийн өмнө гарч ярихаас айдаг гэж үздэг ч илтгэх ур чадварт суралцснаар сандрал догдлолыг удирдах шалгарсан аргуудыг эзэмшдэг.

#4. Мэдрэмж хөглөгдөнө. Таныг сонсож буй хүмүүс юуг илүү чухалчилж, юуг үл ойшоож буйг мэдэрч сурна. Тэдний сэтгэл хөдлөл болон өөрийн сэтгэл хөдлөлийг нийцүүлэн нийтлэг уур амьсгалыг бүтээдэг болно.

#5. Аливаад судалгаатай хандаж сурна. Баталгаагүй яриа хоосон лоозонтой адил учир өөрийн санааг тоо баримт, жишээ, судалгааны үр дүнгүүдээр хөдөлшгүй нотолдог болно. Энгийнээр хэлбэл гаргалгаатай, дараалалтай илэрхийлж сурахаас гадна хэн нэгний яриа, цаасан болон цахим агуулгуудын тооцоололд ач холбогдол өгөөд сурчихдаг юм.

#6. Дуу хоолойгоо зөв удирдаж сурна. Өөрийн ярианы утга санаа, орчин нөхцөл, илтгэх зорилгодоо нийцүүлэн дуу хоолойн өнгө, чанга сул, ритм, хурд, амьсгалаа удирдаж сурна. 

#7. Хүчирхэг нөлөөлөгч болно. Хүмүүс зүгээр нэг сонсоод өнгөрөх биш ажил амьдралдаа шууд тусгах нөлөөллийг үзүүлж, олон хүний амьдралд эерэг өөрчлөлт авчидаг хоёр зүйлийн нэг харилцан яриа, бодит зүйлс, ном байдаг.