Зах зээлийн өрсөлдөөн, уламжлалт шийдвэр гаргах арга барилууд өргөн хэрэглээний бүтээгдэхүүний бизнес эрхлэгчдийг орлогын өсөлтийн менежментийн стратегээ эргэж харахад хүргээд байна.

Өргөн хэрэглээний бүтээгдэхүүний бизнес эрхлэгчдэд тулгарч буй 3 үндсэн сорилт:

Цар тахал дэгдэхээс өмнө ч энэ салбарын бүтээгдэхүүний үнэ өрсөлдөөний улмаас шахалтад орж, бизнесүүд бүтээгдэхүүн үйлдвэрлэлийн бүтээмжээ нэмэгдүүлэх байдлаар ашгаа олдог хүндхэн байдалд ороод байсан.

Энэ хүрээнд бизнесүүд орлогын өсөлтийн менежментээ сайжруулах зайлшгүй шаардлага тулгарсан. Цар тахлын үеэр зарим төрлийн өргөн хэрэглээний бүтээгдэхүүний эрэлт нэмэгдсэн ч бизнесүүдэд шийдэх ёстой асуудлууд байсаар байна. Эдгээр нь дараах байдалтай байна.

#1. Инфляцийн нөлөө: Цар тахлын нөлөөгөөр дэлхийн нийлүүлэлтийн сүлжээнд доголдол үүсч, бүтээгдэхүүний тээвэр болон түүхий эдийн үнэ огцом нэмэгдсэн. Энэ нь өргөн хэрэглээний бүтээгдэхүүний үнэ өсөхөд хүргэсэн. Тухайлбал, үр тариа 10%, шош 60%, хуванцар сав баглаа боодол 200%, эрдэнэ шиш 67%, модон материалын үнэ 200-300% тус тус өссөн байна.

#2. Хэрэглэгчийн зан төлөв, худалдан авалтын зуршил, сувгийн динамикт гарсан өөрчлөлт: Сүүлийн 18 сарын хугацаанд хэрэглэгчдийн зан төлөв, худалдан авалтын зуршил, сувгийн динамик зэрэгт урьд өмнө байгаагүй өөрчлөлтүүд гарсан бөгөөд энэ нь ирэх жилүүдэд бүх бизнест нөлөөлөх хандлагатай байна.

Хэрэглэгчийн зан төлөв:

Зах зээл даяар хэрэглэгчдийн 25-40 хувь нь COVID-19 эхэлснээс хойш өөр өөр брэндийг туршиж үзсэн нь зар сурталчилгааны ач холбогдлыг улам нэмэгдүүлж байна. Нөгөөтэйгүүр, эрүүл мэнд, веллнэсс, болон гэрийн хэрэгцээний бүтээгдэхүүний эрэлт нэмэгдсэн нь хэвээр байх хандлагатай байна. Мөн бүтээгдэхүүн хэрэглэгчдийн газарзүйн байрлал, орлогын ялгаа зэргээс эрэлт хамаарахаар болоод байна. Өргөн хэрэглээний бүтээгдэхүүний эрэлт АНУ-д өндөр орлоготой иргэдийн хэрэглээнээс хамаарахаар байгаа бол Европын засгийн газрууд цар тахлын ажил эрхлэлт дэх нөлөөг бууруулах өргөн хэмжээний арга хэмжээ авсан нь өндөр орлоготой өрхүүдэд л тусгалаа олсон учраас бага орлоготой өрхүүдийн хэрэглээнд сөргөөр нөлөөлж болзошгүй байна. Ази дахь өргөн хэрэглээний бүтээгдэхүүний эрэлт бага, дунд орлоготой өрхүүдээс хамаарахаар байна.

Худалдан авах зуршил: Хэрэглэгчид дэлгүүр явах тоо нь цөөрч нэг удаа дэлгүүр явахдаа худалдан авах бүтээгдэхүүний тоо нь олон болсон. 2020 онд Европчуудын 19 хувь нь худалдан авалтдаа хэмнэлт хийсэн бөгөөд энэ төлөв цаашид үргэлжлэх хандлагатай байна.

Сувгийн динамик: Хэрэглэгчид худалдан авалтыг онлайнаар хийх хандлагатай болсон бөгөөд зарим төрлийн бүтээгдэхүүний онлайн борлуулалт 50%-аас илүүгээр өссөн. Энэ хандлага цаашид ч хэвээр үлдэх төлөвтэй байна. Мөн гэрээс гадуур хэрэглэгддэг өргөн хэрэглээний бүтээгдэхүүний эрэлт буурсан байна.

#3. Үнийн хүчин зүйл: Өргөн хэрэглээний бүтээгдэхүүний орлогын өсөлтийн менежментийг сорьдог эцсийн хүчин зүйл бол үнийн хүчин зүйл юм. Инфляцитай холбоотойгоор нэгж бүтээгдэхүүнээс олох ашгийн хэмжээ буурсан.

Өсөлтийг удирдах шинэ арга барил ашиглах нь

Орлогын өсөлтийн менежментийн үндсэн элементэд үнэ, сурталчилгааны хөрөнгө оруулалт, бүтээгдэхүүний нэр төрөл багтдаг.

Үнэ:  Бизнесүүд үнэ тогтоох стратегээ илүү урт хугацааг харж гаргах хэрэгтэй. Ингэхдээ үйлдвэрлэлийн хэмжээ, үнийн өөрчлөлтийн ашигт үзүүлэх нөлөөллийн загварчлал, нийт үнийн мэдрэмж зэргийг авч үзэх хэрэгтэй. Мөн түүнчлэн хэрэглэгчдийн худалдан авах чадварт үзүүлэх нөлөөллийг үнэлэхээс гадна онлайн худалдан авалтын дүнд үнийн илт тод байдал бий үнэ тогтоох үйлдлээ зохих ёсоор тохируулах нь чухал болоод байна.

Сурталчилгааны хөрөнгө оруулалт: Худалдаа болон сурталчилгаанд хөрөнгө зарцуулахдаа худалдан авагчдын зан төлөвт гарсан өөрчлөлтийн урт, богино хугацааны нөлөөг заавал судлан тусгах хэрэгтэй. Мөн борлуулалтын онлайн сувгуудыг оновчтой ашиглахад анхаарал хандуулах хэрэгтэй.

Бүтээгдэхүүний нэр төрөл: Орлого, зардал дээр үндэслэн бүтээгдэхүүний төрөл зүйлийг тодорхойлох хэрэгтэй. Ингэхдээ худалдан авагчийн шинэ зан төлөв, жижиглэн худалдаачдын эрэлт хэрэгцээ, ашигт байдал зэргийг тусган бүтээгдэхүүн үйлчилгээний төрөл зүйлийг дахин тодорхойлох нь зүйтэй.

Эдгээрийг амжилттай хэрэгжүүлэхэд тоон мэдээлэл дээр шинжилгээ хийх зайлшгүй шаардлагатай. Гэвч 2020 онд үүссэн нийлүүлэлтийн дутагдал, хэрэглэгчийн зан төлөвийн огцом өөрчлөлт нь тоон мэдээлэлд хазайлт үүсгэхээр болсон. Иймд аналитикийн арга барилаа өөрчлөх шаардлагатай болсон байна.

Дээрх дурьдагдсан сорилтуудад үндэслэн MCKINSEY-ээс дараах 3 ажлыг 2022 онд хэрэгжүүлэхийг өргөн хэрэглээний бүтээгдэхүүний бизнес эрхлэгчдэд зөвлөсөн байна.

#1. Орлогоо өсгөх менежментдээ дахин үнэлэх: Одоо ашиглаж буй арга барилдаа дүгнэлт хийж, хэрэглэгчийн зан төлөв, барааны үнийн шахалтад гарсан эрс өөрчлөлтөд нийцсэн шинэ арга барил нэвтрүүлэх шаардлага үүсээд байна. Ингэхдээ борлуулалтын суваг хоорондын зөрчил, гүйцэтгэл муутай дэмжлэгийн үйл ажиллагаа зэргийг сайжруулах гэх мэтээр суурь өөрчлөлт хийх хэрэгтэй.

#2. Шинэ, чанартай дата ашиглах болон ахисан түвшний аналитик хийх: Өргөн хэрэглээний бүтээгдэхүүний бизнесүүд худалдан авагчдын датан дээр оновчтой аналитик хийж, үр дүнг нь тактиктайгаар ашиглаж чадвал шинэ боломж нээж чадна. Бизнесүүд өгөгдлийн сан дах хэрэглэгчийн мэдээлэл дээр үндэслэн сегментчилэн, бүтээгдэхүүний төрөлжилтийг хийж байна.

#3. Технологи ашиглах: Хоорондоо холбоо нягт уялдаа бүхий сувгуудын өсч буй ач холбогдол, хангалттай хэмжээний дата, маш хурдтай өөрчлөгдөж буй зах зээл нь бэлэн байгаа энэ үед технологи ашиглах нь өндөр үр дүнг авчирдаг. Тухайлбал, хэд хэдэн өргөн хэрэглээний бүтээгдэхүүний бизнесүүд шийдвэр гаргалтаа дэмжихийн тулд өгөгдлийн автомат дамжуулалт, автомат харагдах байдлын хэрэгслүүд, үнийн урамшууллын багцыг урьдчилан тооцоолох функц зэрэг аналитикийн чухал үзүүлэлт бүхий өндөр хүчин чадалтай технологи ашиглаж эхлээд байна. Хэрвээ компани энэхүү хүчин чадлыг өөртөө бий болгохыг хүсвэл аналитик дэд бүтэц, хүний нөөц, партнершип, засаглал зэргийг бэлтгэсэн байх шаардлагатай бөгөөд процесс нь дунджаар 18-24 сарын хугацаа шаарддаг байна.

Эх сурвалж: www.mckinsey.com